منــو انتي؟

شلـت همي ورحت أمشي
بس أنــا ويا نفسي
بمجمع..أنا وحــدي
ما تلفــــت
كل همي
لي متى أشيل همي
وهم غيري فوق همي
****
وأتلفــــت
وأشوف حولي الغباء ..والاستطناع
المظاهر بدون جواهر
الرؤوس جنها قــبب
والوجوه فيها عجب
والله هالدنيا غريبة
ما أجهل هالجموع
وما أغبي هالجموع
وما أتفه هالجموع

اعتصر قلبي موجوع
عيني تبجي بكل خشوع
بدون صوت..بدون دمـوع
****
وفجأة.. احنا اصتدمنا
كتفي بكتفه ودرنا
ودارت الدنيا فيني
بعدها رفعت عيني
طول وزين وحلاة
كاملة والله الصفات
بانحراج وأوطى صوت : آسفة آسفة ما انتبهت
رد هو بأعلى صوت : وشهي آسفة..؟
تلمسيني وتصدميني..وهم بعد تعفسيني
وبس تقولين لي آسفة؟
****
انتي يا بنية انتي..
تدريـن صارلي ساعة واقف أنسف غترتي
وجيتي انتي بلحظة وحدة وعفستي هيبتي
وفوق هذا ما كفاج..هم خربتي نسفتي
وبعدها ما عندك إلا "آسفة" ؟
وين أصرفها "آسفة"؟
منو انتي ؟ هاااا
منو انتي؟؟
****
غلى الدم بعروقي
أنا ناقصة هالميوقي
ليش شايف نفسه فوقي
قلت أقول :
منهو انت قبل تسأل منهو أنا..؟
أنا أقولك منهو أنا
****
انا وانت حليب أمك تمزه مز
تركــت أنا حليب أمي
وبنفس اليوم جرعت المر
ومزيتــه وحبيتـــه
ومن بد أهلي داريته
وشفتني جيت أشكي بيوم؟!؟
لا والله صابرة دوم
عرفت الحين منو أنا؟
****
انا قبل تخطي خطواتك
علت ذاتي فوق ذاتك
وترى والله من صغري
عبدت ربي بكل الأشكال
عبدته..بشهادة علم
عبدته..بصلة رحم
وعبدته يوم لساني صنت
وعبدته يوم أبد ما خنت
وعبدته يوم أهلي حشمت
وعبدته يوم غلطت وتبت
وبظل أعبد لين انه يقولون لي اني مت
*****
تسألني وش يهمني؟
طيارة..؟ سيارة..؟
ذهب فضة..؟
ولا فلوس هالدنيا..؟
أنا أقولك..
أنا ماجذب..
إذا جتني كل فلوس هالدنيا
ظهر ايدي أبوسه قبل باطنها
و لأجل ربي أقوم أسجد
وهم أحمد

واذا ماجت
بعد أحمد
وعقب أسجد ..لأجل ربي مو مرة
لكنها ألف مرة عالنعمة الي انا فيها
تدري ليـــــش؟
لان أبد ما تسوى أراكض في هالدنيا عشان فلوس
وأظن خبرك
عشان الفلوس تخيس نفوس
وأنا نفسي عزيزة حيل..ومحفوظة
تدري ليش..؟
لأني أنا محظوظة
إي والله محظوظة
****
للحينك جاي تسأل...أنا منهو؟
أنا انسانة لا حبيت أحب بجد ما ألعب
انا انسانة لا حبيت أهديلك نظر العيون
لجل ما تنجرح الجفون
صحيح أتعب.. وهم أتعب
ولكني أحب الحب
لا مريت من وسطه يرف بجنون
ويسجدلي..ويمجدني.. ويعبدني
ويصرخ..عنج هم يحكون

وأرد انا: وش يقولون؟
يقولي الحب.. بأعلى صوت
يقولون انتي الضحكة
يقولون انتي البسمة
وكل من يعرفج في يوم
تظلين حبيبته دوم

وأضحكله..وأهمسله
لولاك انت
أنا ماكان ليا كون
أنا لولاك يا الحب
أموت اليوم ولا أحيا ميتة قلب
على شانك أنا اتنفس
وعلى شانك أنا أحس

لجل هذا.. بثنايا القلب أحط قلبك
وأغطيك بحرير الروح
وأبوسك وأرجع أضمك
عقبها أبتسم وأقول
عين الحب أنا أحبك
ولا أتصور يجيني يوم
من دونك وأسميه يوم

انا لوما حولي الحب
وربي ..ماكون أنا
ولا بيكون ليا قلب
****
تبي تعرف منو أنا؟
انا انسانة يرف طولي
ويكش جسمي بتفاصيله..
لا مني انا حسيت بمحبوبي يناظرني
وكلي شوق أنا أجيله
****
انا انشليت..بخيانة جلب
خيانة وغدرت فيني
وصحت أنا بأعلى صوت
وما سمعني غير الموت
وطحت وأثرت فيني
تعور حييييل هالطيحة
ولكني..رفعت الراس
واسمعني يا ولد الناس
صحيح في ناس خانوني
وصحيح قراب ضاموني
لكن والله تكفيني
شهادة الوفا فيني
أنا خيانة أبد ما أخون

ترى من طبعي أنا أصوون
****
أنا كل يوم أتشكــر
على النعمة إللي انا فيها..
واقولك قبل لا اشوفك
صحيح ما أعرف وصوفك
لكن ما يشرفني
أعرف أشكال مثلك انت
انا ما تهمني النسفة
ولا هالطول ولا هالزول
ولا هذا الحلا كله
انا يهمني اي انسان جدامي يكون رجال
يكون وفي..يكون سخي
يكون قلبه كله حب
يكون صريح ورهيف قلب
واذا للحين ما عرفت أنا منهو
هم أبرك
****
وأحب أقولك معلومة
أمك حيييل مظلومة
ربت وتعبت بهالزين
وطلع اخره شين بشين
زمــان أغبر
عباله غترة منسوفة
تبني أخلاق مصفوفة

زمــان أغبر
****
وسلامتكم