كل عـــام وانتوا بحب

أمس قبل ما انام.. خذيت جم لحظة تأمل بحياتي

إللي كان والكنكون وإللي بيكون

تذكرت إن اليوم عيد الحب

مادري منو اختار هالتاريخ..ولكن!!

ماحب اخوض في نقاش..هذا بدعة ومو بدعة

كل إنسان حر بتصرفاته

وعقله براسه ويعرف خلاصه

إللي يبي يحتفل خل يحتفل..وإللي ما يبي هم كيفه

;)

على طاري الحب.. أذكر إن اول كنت اقول أنا مستحيل أتزوج انسان ما أحبه

كان شرطي الحب ثم الزواج

ومسألة الزواج يأتي بعده الحب كانت لا وألـــــف لا

صحيح حبيت قبل الزواج لكن ما تزوجت إللي حبيته

الحمدلله

وإللي تزوجته..بعد الزواج حبيته

نكتة والله

وعلى ضوء كل هذا

أقدر ألخص خبرتي في شيئين

"أولا: الحب قبل الزواج يكون مبني على أساس "البعد

لما تعرف انسان وأطباعه واهوه بعيد..سواء بتلفون..جات..أو حتى مقابلات بسيطة

هذا أبدا مو مقياس لمعرفة الشخصية

والوضع متبادل بالنسبة للطرف الآخر

البعد إللي بين الشخصين يخلق شوق وعاطفة

هدفها الأخير القرب.. يمكن يكون ويمكن ما يكون

وغالبا غالبا..لا يكون

وان كان تكون نسب النجاح ضئيلة

"ثانيا: أما الحب بعد الزواج فيكون مبني على أساس "القرب

إنسان ما تعرفه وفجأة تنقط معاه بنفس البيت

وتجابله 24 ساعة 7 أيام في الأسبوع

حتى الفراش ياخذ نصه

أول شي يكون الوضع صعب انك تتأقلم مع شخص غريب عنك

لكن مع الوقت.. تبدي تشوف أطباعه

الحلو والمر

تبدي تعرف شنو مستعد يسوي علشانك

وانت شنو مستعد تسوي عشانه

تجمعكم عشرة وعيش وملح

وضحك وبجي

وسوالف وهواش

تغلط وتتاسف

يغلط ويتأسف

يكون يمك في أصعب اللحظات

مو إلا يقول كلمة

كفاية يلمك عشان تعرف إنه يمك وانك بخير

كل هذا مو بالتلفون

لاااا

تشوفه جدامك

تشوف كل تعبير بويهه..وكل تجعيدة

وكل حركة جسم

تشم ريحته.. وتسمع صوته

تلمسه ويلمسك بكل حنية

حتى طعم شفايفه.. ينطبع بالذاكرة

تعيش الحب بكل حواسك

تحبه لأنه قريب

إذا عرفت إنسان بحلوه وبمره

وهم تظل تحبه

شنو يبقى أكبر من جذي؟!؟

البعد من بعد القرب ما وراه إلا الشوق

لكن القرب من بعد البعد.. هممممم... مودري والله

مثل ما دايما أقول..الله له حكمة في كل شي

لو كان الحب قبل الزواج أساس

جان الله قال حبوا بعدين تزوجوا

بالأخير...كلها توافيج من رب العالمين

ختاماً

كل عام يمر وانتوا بحب وشوق

والله يديم المحبة عالجميع

مو يوم.. لكن دوم وكل يوم

HaPpY VaLenTineS ;)