اليوم عيد ميلاد اختي.. كملت 25 سنة ماشالله.. العمر كله انشالله
ماعرفت شنو أكتبلها..بس تذكرت وايد أشياء مرت بينا..وحبيت أذكرها
ولو إني ماعتقد إنها ناسية
مريم".. كل عام وإنتي بألف خير"
عسى الله لا يحرمني منج
*********
تذكرين..؟
أخيتي
تذكرين..؟
لما كان عمرج سنتين
تغير شي بدنيتج
أمي يابتلج اخت
تذكرين..؟
*****
مرت عقبها سنين
تقريبا خمسة.. وشهرين
في ألبوم الذكريات
كانت لنا كثير حكايات
أذكر في إحدى الصور
كنتي إنتي توقفين
وأنا يمج عاليمين
عندي إياها.. لحد الحين
بذاك القارب قاعدين
ويا أمي ومستانسين
"وكان بيدينها "عمر
ماشالله مثل القمر
كنتي إنتي عجفتين
وكنت أنا عنقوصين
تذكرين..؟
*******
ابتسامتنا بريئة
وحتى هدومنا بسيطة
كنا حيل مبسوطين
تذكرين..؟
كنا لما نتصور
حيل فوق رافعة حنجي
وشادة جسمي وشاقة حلجي
لأن أدري إنتي يمي
وهذا يكفيني فخر
والله يكفيني فخر
إنج معاي بهالصور
تذكرين..؟
*****
لمـــا أسترجع صورنا
كانت دوم فيها لمعة
طالعة من "ألماس"عينج
كنت أحبها
وللحين أحبها
لمعة فيها إحساس تفاؤل
دايم بكل الصور
كان بعيونج حماس
كنتي قمة بالإحساس
وكانت هذي بصمتج
تذكرين..؟
******
تذكرين..؟
يوم كنا بالمدرسة
واحد يتطنز علي
وأركض أدور عليج
مريم!!! يتطنز علي
تذكرين..؟
قمتي إنتي بلا تردد
قمتي قلتي كلمتين
مكان ما إحنا واقفين
بوسط ساحتنا الكبيرة
ساحة..جزء من جبل
كنا إحنا بقمته
وفجأة ايدج دزته
وصار اهوه بقاعته
وصار لإسمنا هيبته
تذكرين..؟
******
تذكرين؟
لما كنا نتهاوش وانتناقش
وأعتقد لحد الحين
تذكرين..؟
وكنتي تزعلين.. والنونة تعقدين
وأنا أتحلطم..وأتقرطم
داخل قليبي أتمتم
"أبي أقلدج"
"إي أبي أقلدج"
لأن ماعرف بهالدنيا غيرج
إنتي الشمعة بحياتي
تنوري وتضوي حياتي
"كيفي"
"إلا أقلدج"
وهم اقلدج
تذكرين..؟
وتتنرفزين
وتعصبين
ومرات تحقرين
أيـــوز تتوقعين..؟!؟
لا.. أرد أقلدج
تذكرين..؟
******
تذكرين..؟
عنيدة ودلوعة أبوي
كل ما صار شي.. أفتن
وكله لازقة بحضن أبوي
يــــــــااااااااه
والله إني كنت مليقة
مــادري ياهل..أو بريئة
وانتي دوم كنتي عنيدة
بس هالدنيا جمعتنا
وين كنا و وين صرنا
تذكرين..؟
******
تذكرين..؟
يوم نتسابق بالصلاة
إللي يسبق اهوه فايز
بالي والله.. مو الصلاة
جايز ولا ماهو جايز
بالي..أنا فايز يعني فايز
تذكرين..؟
كنا ما نعرف خشوع
بطرف عيني..قاعد اشوفج
!!..بتسبقني
!!..بتسبقني
وصج سبقتي....وضحكنا
تذكرين..؟
بس عقبها أبوي طقنا
قالنا بأعلى صوت
"!! هذي مو لعبة.. صلاة"
"هذي ما فيها سباقات"
تذكرين..؟
*******
تذكرين..؟
سنة سبعة وتسعين
الحج ويا أبوي رايحين
كان زحمة وريحة خايسة
كان حر وقمتة زايدة
وطحت أنا
غشيــــــــــانة
كانت الأولى بحياتي
وكنتي يمي
تسحبيني وتسنديني
وحتى ماي زمزم شربتيني
تذكرين..؟
*******
ومرت عشر سنين
كانت أصعب السنين
بس هونها وجودج
بداري مرة ومرة دارج
كنتي معاي تضحكين
وهم معاي تبجين
تذكرين..؟
كنت أدري داخل قلبي
إن مهما صار وتم
ودارت الدنيا في يوم
إن في قلوبنا قسم
كنت دايم لما أخاف
ما تمر لحظتين
عقب أستوعب حياتي
"ليش اخاف..؟!؟"
"ليش أخاف وإنتي يمي..؟"
شايلة خوفي وهمي
لو تهدني الدنيا كلها
وإتخلى بكل أهلها
أدري إنج توقفين
وتمسكيني وتقولين
لا أبدا ماخلي أختي
هذي من لحمي ودمي
أدري إني في أمان
وأغمض جفني وأنام
لأن أدري مها صار
إنتي أختي و إنتي أمي
وانتي من لحمي ودمي
وأوعدج مهما يصير
أضم قلبج..هالكبير
وأوعدج إني أعيش
شايلة همج وهمي
إنتي وحدج تاج راسي
وبعد كل هلي وناسي
لو تبين ماي عيني
والله ما يغلا عليج
******
أنا حبيت أختصرلج
ثلاثة وعشرين سنة من عمرج
بذمتج لما تفكرين
تعتقدين بهالسنتين
قبل ما تييلج أخت
هالسنتين..كانوا حلوين..؟؟
يسوون تتوقعين..؟
********
عقب 450 شهر
باذن الله إن كتب لنا عمر
أكون أنا بالثمانية وستين
وإنتي عيوزة أم سبعين
طق طق طق
منو بالباب..؟
أنا أنا.. أختج
هلا اختي هلا أختي
أقول مريم
..بذمتج
تذكرين..؟
4 comments:
Ahh thats a sweet sister love :) Happy Birthday Maryam...where is the birthday cake with 25 candles on it?
btw the post is long long long...I know with my amazing Arabic literature I am lost but hey fa6oom I did get it nearly there... :D
مسكرتي ساحت من ادموعي و ضحكتي
والله عليج سوالف ...
You know I don't like to cry but I did and I have rakoon eyes to prove it.
You know you make my day just by a single word and a smile. I don't know how you do it, but you do.
When I thought I couldn't love you more I did :*
You are my world
amu: loool.. I couldn't write it in english.. :)
It's memories, should be long, I had more but my headache stopped me
Maryam: looool.. putting mascara on your birthday.. ;)
Well just to show you that your life before me wasn't worth it
23 years only count ;)
love ya :*
Post a Comment